Baat Karta hai

Na dollar baat karta hai na Lira baat karta hai
Sar-e marqad farishton se aqeeda baat karta hai

Fidayaan e Ali o fatima zehara ki janib se
Shah-e ghaibat se ghaibat me areeza baat karta hai

kisi ke hath ki garmi se paththar narm hota hai
Hatheli par kisi ki sang reza baat karta hai

Kabhi fitrus jo ata hai mere mayoos khabon me
kisi bachche ke jhoole ki hamesha baat krta hai

janaza le ke aye hain, wo us ki aazmaish me
Ke Jiska hukm mil jaye to murda baat krta hai

Ye mauqa phir na ayega, utho bedaar ho jao
Sipah e shaam se hur ka savera baat krta hai

faraz e dar par meesam ke jaise haq bayano'n ki
zabane'n kaat di jayen to jazba baat krta hai

Abutalib se haider se shah e mazlom o bekas se
Museebat me inhi logon se kaaba baat karta hai

Alam jab nasb hota hai kahin abbas e ghazi ka
Wafaon ki hawaon se pahraira baat karta hai

Qaza ke dar se jab ahl-e zaba'n mu pher lete hain
Bala ke dasht me Asghar akela baat karta hai

🌹🌹🌹🌹🌹🌹🌹🌹🌹🌹🌹

Eram Mehdi

intezaar ka

Saghar chalak raha hai mere etebaar ka
Palkon pe hai charagh tere intezaar ka

tera koi qusoor na apna koi qusoor
sab khel hai masheeyat e parwardigaar ka

Chashm-e karam ki tegh jigar me uataar do
qissa bas aab tamam karo baar baar ka

dil me machal rahi hai gadayi ki aarzu
mujh ko pata batyae koi koye yaar ka

soorat ubhar ke ayegi zinda Imam ki
dekho nizam ghaur se lail o nahar ka

han han wahi Makan, Ali aye the jahan
Markaz wahi banega tere iqtedar ka

thehro tabeeb e nafs ko ane to do zara
dunya me aek dau chale ga  sudhaar ka

qayem tawafe qabr e payambar ko rok kar
pale karenge paak ahata mazaar ka

nusqe bana ke de gi burash zulfeqar ki
hoga ilaaj bughz e ali ke bukhar ka

Eram Mehdi

Gugunane lage

ham jo naad e ali gugunane lage
Waez e mohtaram barbarane lage

Zikar e haider pe khamosh the shaekh ji
Hoor ke naam pr pahpharane lage

tab samjhna ke zulmat din lad gaye
jab jidar e haram khilkhilane lage

bad e mursal jo roti ke laale pare
sab dar e murtaza khatkhatane lage

Kiya tabassuma tha Sarwar ke besheer ka
Laskhron ke qadam Larkhrane lage

Sabr ki dhal pr sheh ne roka unhen
teer baiyat ke jab sansanane lage

binte zahra jo dakhil huin shaam me
Sab emaad e sitam charcharane lage

harsh me ashiqan e ali ke liye
door tak noor ke shamyane lage

sirf ghasib ko ghasib kha tha eram
Ghasiban e fidak tilmilane lage

Eram Mehdi