Kon hai

Bad e mursal ummat e uzma ka rehbar kon hai

Janasheen e masnad e mahboob e dawar kon hai

Sayaay e  lutf e khudawandi Ka mehwar kon hai

Poochye quraan se nafse payambar kon hai

Fakhr e meesam kon hai, Maolaye qambar kon hai

Mard e Maida`n, fatah e maidan e khaibar kon hai

Kon hai Deen e ilaahi Ka muhafiz aaj tak

Badr se ta Karbala manzar ba manzar kon hai

Kis ki zaat paak me muzmar hain ausaf e Rasool

Aalam e khaaki me wo aaeena paikar kon hai

Kis ne bakhshi raah me saayel ko untoon ki qataar

Dhondye dunya me aisa Banda parwar kon hai

Jis ke khatir khanaye Kaaba zacha khana bana

Jis ne do para Kiya  jhoole me ajdar kon hai

Yun to lakhon wirsaye mursal ke dawedar hain

Deekhna hai Waris e ilm e payambar kon hai

Pesh e khaliq hazrat e waiz ki bakhshish ke liye

Juz Ali maidan e mehshar me mayassar kon hai

Baad me keejyega Haider se taqabul, awwalan

Dundye ham pallaye Salman o boozar kon hai

Naaraye Haider laga deejye pata chal jayega

Aayena hai kon is mehfil me pattar kon hai

Sath pahunchunge dar e jannat pe Sadiq aur eram

Jab nida aayegi hatif ki sukhanwar kon hai

Neek khu Muhammad ke

 Ham hain har zamane me neek khu Muhammad ke

Taur seekh le waez ham se tu Muhammad ke

Jo nazar me qura'n ki dushman e risalat hain

Jaan o yar  kehta hai unko tu Muhammad ke ?

Be adab sahaba Ke dono hath khali hain

Do jahan ke Malik hai Maah ru Muhammad ke

Jitne bhi munafiq hain mu chupa ke royenge

Hashr me muhib honge Surkh ru Muhammad ke

Sirf ham zami'n waale madh khuwan nhi inke

Jane kitne shiada hain Ku ba Ku Muhammad ke

Kash ham haqeeron ko quld me mile mauqa

Madh e Shan e Haider ho ru ba ru Muhammad ke

Sham e khulq e Ahsan se itna noor nikla hai 

Ab zamin pe jalve hain Char su Muhammad ke

Rabt hai imamat Ka is qadar risalat se 

Bara aayenon me hain bara ru Muhammad ke

Chahe koi zauja ho ya koi sahabi ho

Dushman e ilahi hain sab adu Muhammad ke

Eram Mehdi

Kabhi na kabhi

 

Naqaab ultega rashk e qamar Kabhi na kabhi

Khulegi qismat e nau e bashar Kabhi na kabhi

Yaqi'n hai ayega wo rahbar Kabhi na kabhi

Zaroor hoga dua me asar Kabhi na kabhi

Dhalegi zulm ki ye do pahar Kabhi na kabhi

 Jo aaj zer hain honge zabar Kabhi na kabhi

Isi umeed me nazen bichaye baithe hain

Shab e firaaq ki hogi *sahar* kabhi na kabhi

Ghilaaf e sabr se niklegi zulfeqar e ali

Hunar dikhayega daste hunar Kabhi na kabhi

Wo jis ki zau se andheron ka dam nikalta hai

Wo Noor dekhegi har chashm e tar Kabhi na kabhi

Zami'n pe adl e ilahi ka dabdaba hoga

Basenge hubbe Ali ke Nagar Kabhi na kabhi

Bala o jaur ke lamhe guzar hi jayenge 

Haram se ayegi achchi khabar Kabhi na kabhi

Rahegi zinda o Javed daulat e imaan 

Milenge khaak me sab seem o zar Kabhi na kabhi

Pas e ghadeer saqeefa ki haisiyat Kiya hai

Zaroor tootega sheeshe Ka Ghar Kabhi na kabhi

Yazeed zada hi bolyega aayaton ke khilaaf

Lahu dikhayega apna asar Kabhi na kabhi

gham e jahan ki shabe'n bhi tamam hongi eram

Tuloo hogi karam ki sahar Kabhi na kabhi