ban ban ke poochte ho ke Sher e khuda hai kon
Zarre bhi jante hain ke wo baasafa hai kon
kis ne buton se paak kiya kibriya ka ghar
har gaam par nabi ka sahara bana hai kon
kis ka wajood Shamme hidayat hai aaj tak
dono jahan ka uqda kusha, rehnuma hai kon
kis ki wajha se doobta sooraj ubhar gaya
bad e nabi zameen pe mojiznuma hai kon
kis ko jahan kehta hai hallal e mushkilaat
dunya me momeneen ka mushkil kusha hai kon
Kis ke qadam ke naqsh, hain har aasman par
meraaj me huzoor ka raaz aashna hai kon
kis ka jina'n me aqd hua hai Batool se
wo ze weqaar, jaan o dil e mustafa hai kon
kis ke pisar hain malik o mukhtar khuld ke
roz e hisaab shafaye ahl e wila hai kon
kis ki wela ke rang me rangi'n hai salsabeel
jannat ke sakino'n ke dilon ki sada hai kon
Kis ki nazar ke samne arz o sama bane
jis ki khabar hai hamd me wo mubtada hai kon
kis ne mahaaz e khaibar o khandaq ko sar kiya
dhondo nabi ki bazm e me wo soorma hai kon
kis ke dar e saqa pe mili deen ko panaah
daur e fitan me sayaye e lutf e khuda hai kon
kis ko kaha ghadeer me Maula Rasool ne
nafs e khuda, waseeye rasool e khuda hai kon
Aisey na keejiye haq o batil ka faisla
jang e jamal batayegi ab ta kuja hai kon
ham maykashon ko yaad hai har pal ghadeer ka
pee kar sahaabion ki trah bhoolta hai kon
Qura'n ka harf harf hai jiski Sana Eram
ye bhi koi sawaal hai sher e khuda hai kon ?
ERAM MEHDI
