Wiladat hai Askari ki

jina'n ki bu bhi na pa sako gey agar adawat hai Askari ki
Wahi Hain bas kaamyab Jinke Dilon me ulfat hai Askari ki

Nabi ki itrat ka bughz tujhko zaroor mehnga parega aek din
Yahan tu waez Jo chahe Kar le wahan hukumat hai Askari ki

Samjh na ayega ahle Shar ko kabhi bhi Ibne naqi ka rutba
Pata to rooz e jaza chalega ke kitni Azmat hai Askari ki

duroon e marqad, baraoz e mehshar, baraye jannat, ta hauz e kausar
Tumhen zaroorat nahi to na ho hame zaroorat hai Askari ki

Wahi adalat wahi sakhawat wahi karamat wahi shajaat
Jo tarz o seerat thi Murtaza ki wo tarz o seerat hai Askari ki

Sajao masnad bicho nazren, jamao mehfil padho qaseede
Lagao salle ala ka nara Shab e Wiladat hai Askari ki

hawaye me khushbu jo ghul rahi hai, fiza ko makhmoor kr rahi hai
Bata rahi hai Chaman ki raunaq gulon me nikhat hai Askari ki

Inhi ki azmat ke saare Darya, khuda ne malfooz kr diye hain
wo jisko kehte hain aap qura'n Bayaz e midhat hai Askari ki

Eram Mehdi