مشعلِ حق آگہی نذرِ ہوا ہو جائے گی
رک گیا ماتم تو دنیا بے صدا ہو جائے گی
شام کی تاریکیوں سے نور میں آنے تو دو
دیکھنا یہ قسمتِ حر کیا سے کیا ہو جائے گی
مدحتِ آلِ محمد جا بجا کرتے رہو
بالیقیں دنیا بھی اک دن ہم نوا ہو جائے گی
دل کے ٹکڑوں سے سجائیں گے اسے جس دن حسین
کربلا عظمت میں کعبے سے سوا ہو جائے گی
معرفت کرب و بلا کی ہوگئی جس دن ہمیں
زندگی آئینۂ صدق و صفا ہو جائے گی
مرکزِ جود و سخا ہے بابِ شاہِ انقلاب
خاک بھی لے آئے کوئی کیمیا ہو جائے گی
کربلا سایہ فگن ہے جب تلک ہم پر ارم
جو بلا ٹکرائے گی ہم سے فنا ہو جائے گی
ارم مہدی
No comments:
Post a Comment